Dagstuk | Dinsdag 26 Augustus 2025

https://youtu.be/Dyr6PZJu_Nc

TEKS KOLOSSENSE 3:2 “Rig julle gedagtes op die dinge wat daarbo is, nie op die dinge wat op die aarde is nie.”

BOODSKAP

Paulus skryf hierdie brief aan die Kolossense vanuit die tronk. In hierdie spesifieke hoofstuk maan hy die gemeente om doelbewus verantwoordelikheid te aanvaar vir hulle denke.

As gelowige is ek verantwoordelik vir wat in my verstand aangaan. Ek het beheer oor my fokus, en ek moet seker maak ek fokus op dit wat werklik belangrik is. Rig jou gedagtes op die dinge daarbo

Eerstens het die gelowige die verantwoordelik om te “…strewe na die dinge daarbo…” Met ander woorde, my lewe moet ingestel wees op wat die Here wil hê en nie op wat my vlees wil hê nie. Dit moet my hele lewenstrewe wees om Jesus tevrede te wil stel.

Tweedens is dit die gelowige se verantwoordelikheid: “…rig julle gedagtes op die dinge wat daarbo is...” Elke gelowige is verantwoordelik vir wat in sy denke aangaan. Soos die ou gesegde sê: “Jy kan die kraaie nie keer om oor jou kop te vlieg nie, maar jy kan keer dat hulle in jou hare nes maak!” Hierdie gesegde beteken dat ek verantwoordelikheid moet aanvaar vir my denke.

Hoe meer ons ons denke op God fokus, hoe meer word ons vernuwe en verander om nog meer van Sy karakter te kry. Dit is die poleerwerk wat die Here deur Sy Gees in ons doen. Wanneer mense na ons lewens kyk sal hulle nie meer die weerklanke van die wêreld in ons lewens sien nie, maar hulle sal in ons lewens die weerklanke van ’n hemelse werklikheid sien. Ek sal anders lewe. Die Bybel is baie duidelik daaroor. Die regte gedagtes sal lei tot die regte optrede. Anders gestel jy sal nie jou gedrag kan verander as jy nie jou gedagtes verander nie. Soos ons lees in Rom 12:2 Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is

GEBED

Vader, kom help my om my gedagtes te rig op U. Ek is lief vir U en ek wil die wêreld deur u oë sien. Kom help my om my hart in te stel op U wil en op wat U van my verwag. Ek wil my gedagtes rig op dit wat daarbo is. AMEN!