Dagstuk | Donderdag 28 Augustus 2025

TEKS: MARKUS 6:31 Daar was baie mense wat gedurig gekom en gegaan het, sodat Jesus en sy dissipels selfs nie kans gehad het om iets te eet nie. Hy sê toe vir hulle: “Kom julle alleen saam na ‘n stil plek toe en rus ‘n bietjie.”

Ons ken die ou gesegde: “Minder is meer”. Dit beteken basies net om meer reg te kry, moet jy minder dinge beter doen in plaas van om baie dinge te probeer aframmel.

Dit is waarom Jesus sy dissipels eenkant toe neem om te rus. Jesus het homself ook gereeld eenkant afgesonder om te bid en tyd met die Vader te spandeer. Jesus het veilige grense in sy lewe ingebou sodat Hy tyd gehad het vir dit wat werklik belangrik was.

Daar is soveel dinge in die lewe wat ons aandag opneem. Maar hoeveel daarvan is werklik belangrik? Hoeveel van dit waarmee ons onsself so besig hou, het werklik ewigheidswaarde?

Wanneer ek verstaan dat al my bronne net aan my geleen is en dat die Here my eendag verantwoordelik gaan hou vir hoe ek dit benut het, dan moet ek my lewe prioritiseer. Ek moet my tyd, geld, gesondheid en verhoudings prioritiseer sodat ek my lewe kan leef met maksimum ewigheidswaarde.

Daar is ‘n tyd en ‘n plek vir alles. Wanneer ek werk wanneer ek moet werk, sal ek kan rus wanneer ek moet rus. Dit werk ook ander kant toe: Wanneer ek rus wanneer ek moet rus, dan kan ek werk wanneer ek moet werk.

Ons kan iets by Moses leer vanuit Psalm 90:12: “Leer ons ons dae so gebruik dat ons wysheid bekom.” Here, leer my om my lewe te prioritiseer sodat ek nie die kosbare bronne wat U vir my geleen het, mors nie.

 Om hard te werk, is eerbaar, maar om slim te werk, is nog beter. Salomo gebruik die voorbeeld van ‘n man wat hard werk omdat sy byl stomp is. Dit kan wees dat hy so hard werk en onder druk is dat hy nie die tyd maak om sy byl skerp te maak nie. Maar as hy net die tyd sou afvat om die byl skerp te maak, sou hy soveel meer effektief kon wees. Hierdie is ‘n baie belangrike les om reserwes in jou lewe in te werk. Soms verloor ons kosbare tyd net omdat ons nie die tyd afvat om te beplan en te organiseer nie.

GEBED

Vader, dankie vir rustye in my lewe. Help my om dit goed te benut sodat ek produktief kan wees wanneer ek moet werk. AMEN