Dagstuk | Saterdag 1 November 2025

Vandag is Saterdag 1 November en hierdie week wandel ons binne ons gemeente se vierde waarde  om voortdurend te vernuwe.

Vandag kyk ons na vernuwing deur diens. Vernuwing kom ook deur diens aan ander, waar ons God se liefde in aksie uitleef. Deur ons gawes en tyd te gebruik om ander te seën, word ons self vernuwe in ons roeping en doel.

Teks: Galasiërs 5:13 “Julle, broers, julle is tot Vryheid geroep. Moet net nie julle Vryheid misbruik as ‘n verskoning om sonde te doen nie, maar dien mekaar in liefde.”

Hierdie vers herinner ons dat ware vryheid in diens lê. Deur ander te dien, weerspieël ons Christus se liefde en word ons harte vernuwe. Diens bring vreugde en doel, en dit verbind ons met God se hart vir die wêreld. Vernuwing deur diens vra dat ons ons selfgesentreerdheid aflê en kyk na die behoeftes van ander. Of dit nou klein dade van vriendelikheid of groter opofferings is, diens transformeer ons en diegene om ons. Laat ons soek na geleenthede om te dien en God se liefde te deel.

Gebed: Here, vernuwe ons deur die vreugde van diens. Help ons om ander met liefde te dien, soos U ons gedien het. Gee ons oë om die behoeftes om ons te sien en harte om U liefde uit te dra. Amen.