Dagstuk | Saterdag 10 Januarie 2026

Vandag is Saterdag 10 Januarie en ons is tans in die kerklike seisoen wat ons Epifanie noem. Die fokus van Epifanie is die viering van God se verskyning en bekendwording aan ons. Epifanie verkondig dat God hier is. Regdeur die Bybel sien ons hoe mense bewus raak van God se teenwoordigheid en hoe hulle daarop reageer. Epifanietyd daag ons uit om voor God se aangesig te leef en ons identiteit daar te laat vorm.

Vandag reflekteer ons verder oor hierdie tydperk van Epifanie met die tema:

Versorging van verhoudings

Gee in 2026 doelbewus aandag aan die mense in jou lewe. Koester gesonde en ondersteunende verhoudings. In ’n wêreld waar tyd skaars is, is daar min beleggings so waardevol soos om tyd en moeite in ander mense te belê. Dit is juis wanneer ons in koinonia — in gemeenskap met ander — leef, dat ons iets ontdek van God se hart vir ons en vir mekaar. Vier die lewe saam met ander rondom die tafel in 2026. Bemoedig mekaar en dra mekaar in gebed.

Bybelteks: Efesiërs 4:2–3
“Wees altyd beskeie, vriendelik en geduldig, en verdra mekaar in liefde. Lê julle daarop toe om die eenheid wat die Gees tussen julle gesmee het, te handhaaf deur in vrede met mekaar te lewe.”

Wysheid: Nederigheid en diensbaarheid
Die versorging van verhoudings begin by ’n hart van nederigheid, sagmoedigheid en lankmoedigheid. Hierdie eienskappe help om ’n ruimte van liefde en vrede te skep waar verhoudings kan groei. In hierdie daaglikse reis van versorging word ons geroep om doelbewus moeite te doen vir harmonie en eenheid.

Laat ons onsself elke dag afvra:
Hoe kan ek die eenheid van die Gees bewaar deur liefde en vrede in hierdie verhouding?

Laat liefde die gids wees en vrede die anker terwyl ons, deur diensbaarheid, sorg dra vir die mense rondom ons. Só word God verheerlik en openbaar ons Sy liefde — die liefde wat Hy self vir ons kom voorleef het hier op aarde.

Gebed:
Here, dankie vir die gawe van verhoudings. Ons bid vir u leiding en genade om hierdie verhoudings met sorg te versorg. Help my om ’n hart van nederigheid en sagmoedigheid te hê, en gee my die geduld om lankmoedig met ander te wees. Mag ek, deur u krag, ’n aktiewe rol speel om die eenheid van die Gees te bewaar deur liefde en vrede in my verhoudings. Amen.