Dagstuk | Saterdag 20 Desember 2025

Prediker 3:12
“Ek het tot die insig gekom dat daar vir die mens niks beter is nie as om vrolik te wees en die goeie van die lewe te geniet.”

Die outeur van Prediker het ’n plek in die lewe bereik waar hy deur godsdienstiges se oortuigings en perspektiewe ontnugter is. Hy het teenoor hulle godsdienstige modelle en resepte gekom wat allerhande verklarings vir die lewe probeer bied. Prediker is gefrustreer omdat hierdie modelle God in ’n boksie plaas, wat Sy invloed beperk. Daarom trek hy sulke dinge in twyfel en probeer hy sy lesers tot ’n dieper insig begelei. God is groter as ons resepte — elke oomblik van die lewe is gevul met die geheimenis van Sy teenwoordigheid, waarvan die waarheid telkens weer in ons deurbreek.

Wanneer ’n mens aan die einde van die jaar terugdink oor die gebeure daarvan, bring dit ’n mens by ’n besondere plek uit. Ons dink nie net aan die goeie tye en probeer ontslae raak van die slegte van die jaar nie. Ons kom tot die insig dat die Here ons ook op besondere maniere in die uitdagende en moeilike tye gevorm het. ’n Mens is dankbaar vir nog ’n jaar waarin ons menswees deur die Here gevorm is — ’n jaar wat ons in staat stel en krag gee om die tye wat nog voorlê tegemoet te gaan.

Ek het tot die insig gekom dat daar vir die mens niks beter is nie as om vrolik te wees en die goeie van die lewe te geniet.
Mag hierdie teks van Prediker jou vandag bring by ’n plek van dankbaarheid vir die jaar wat verby is, en ’n plek van hoop en verwagting vir die aanbreek van ’n nuwe jaar.

Gebed

Here ons God,
U wat die tye en seisoene van die lewe in U hand hou,
ons kom voor U met Prediker se wysheid in ons harte:
dat daar niks beter is vir die mens
as om bly te wees en die goeie te doen
terwyl ons die asem het wat U gee.

Leer ons, Here, om die eenvoudige gawes van elke dag raak te sien —
die oomblikke van genade,
die vreugde in gewone dinge,
die vrede wat kom wanneer ons goed doen vir ander.

Maak ons harte lig, Here,
nie ligsinnig nie,
maar vol van die vreugde wat uit U kom.

Laat ons vreugde nie afhanklik wees van omstandighede nie,
maar geanker wees in U teenwoordigheid.

Here, herinner ons dat die tyd wat ons het U geskenk is.
Laat ons dit wys gebruik:
met dankbaarheid, met liefde, met goedheid.

Amen.