Dagstuk | Saterdag 23 November 2024

Vandag is Saterdag 23 November en ons reflekteer die week oor Soli Deo Glorie: Aan God alleen die Eer!

Ons vra die vraag vandag oor die uitwerking van Soli Deo Gloria in die gemeente?

Bybelvers: “Laat julle lig so voor die mense skyn, dat hulle julle goeie werke kan sien en julle Vader wat in die hemel is, verheerlik.” — Matteus 5:16

Soli Deo Gloria moet nie net in ons individuele lewens sigbaar wees nie, maar ook in die gemeenskap van gelowiges. Die kerk is die liggaam van Christus en moet alles doen om die naam van God groot te maak. Dit is nie net die prediker of leiers wat die verantwoordelikheid dra om God te verheerlik nie, maar elkeen van ons in die gemeente het ‘n rol om te speel.

In Matteus 5:16 herinner Jesus ons om ons goeie werke aan die wêreld te wys, nie om ons eie naam groot te maak nie, maar om God te verheerlik. As gelowiges leef ons nie vir onsself nie, maar as ’n gemeenskap wat saam na God se eer streef. Dit is ons gesamentlike doel om God te verheerlik in alles wat ons doen, of dit nou is in ons aanbidding, ons diens of ons interaksie met ander.

Gebed: Here, help my om U eer te verheerlik, nie net in my eie lewe nie, maar ook in die gemeenskap van gelowiges. Laat ons ‘n kerk wees wat in alles U naam grootmaak. Soli Deo Gloria. Amen.