Dagstuk | Saterdag 30 Augustus 2025

TEKS : 1 TIMOTEUS 6:17-19: Dié wat in hierdie wêreld ryk is, moet jy waarsku om nie hooghartig te wees nie. Hulle moet nie hulle hoop op die onsekerheid van rykdom vestig nie, maar op God wat alles ryklik aan ons gee om te geniet. 18Spoor hulle aan om goed te doen, om ryk te wees in goeie dade, vrygewig en mededeelsaam. 19So vergader hulle vir hulle ‘n skat as ‘n goeie belegging vir die toekoms, sodat hulle die ware lewe sal verkry.

BOODSKAP

Die hele westerse samelewing en kultuur het die idee aan ons verkoop dat die een wat die meeste besittings en geld het, die gelukkigste is. Maar wanneer ons kyk na al die emosionele ellende, dan kom ons eintlik agter dat die strewe na meer rykdom eintlik dit wat werklik belangrik is, in die slag laat bly het. Mense se huwelike en gesinne verkrummel omdat mense hul siele verkoop om aardse rykdom bymekaar te maak. Dit is waar die gesegde vandaan kom: “The trouble with being in the rat race is that even if you win, you’re still a rat.” Wat help dit ek kom aan die einde van my lewe en ek het al die speelgoed wat my hart begeer het versamel,  maar my verhoudings lê soos wrakstukke langs my lewenspad?

Paulus gee Timoteus die opdrag om die ryk mense te waarsku, hulle moenie hulle vertroue in hul aardse rykdom plaas nie. Hulle vertroue moet liewer in die Here wees. Is dit ‘n probleem om ryk te wees? Nee, glad nie. Paulus sê dit ook. Die Here het vir die ryk mense die rykdom gegee om alles ryklik te geniet. Natuurlik is dit ‘n heel ander probleem om ryk te wil wees en jou siel te verkoop om rykdom te verkry.

Die Here wil hê ek moet in tevredenheid en dankbaarheid lewe. My oë moenie die heeltyd dwaal en kyk na wat ek nie het nie. My fokus moenie wees op wat ek het en wat ek nie het nie, maar liewer op wie ek is in Christus. Wanneer my oë op die kruis gerig is, dan vul dit my hart met dankbaarheid omdat ek weet die Here het my gered. Wanneer my hart so met dankbaarheid gevul is, dan kom tevredenheid onwillekeurig. Hoe kan ek met ontevredenheid lewe as ek weet waaruit die Here my gaan red het. Die Here roep my om lig en met voete plat op die aarde te lewe. Vir my om dit reg te kry, moet ek lewe met dankbaarheid en tevredenheid.

GEBED

Vader, dankie dat U vir my alles gegee het om van te lewe in

hierdie lewe. Ek kan op U vertrou en in totale oorgawe aan U

lewe. Kom leer my wat dit beteken en hoe ek dit moet doen.

Help my om U te eer in elke aspek van my lewe. AMEN!