Dagstuk | Woensdag 10 Desember 2025

Tema: “Om nuut te begin”
Bybelteks:
Klaagliedere 3:21–23 — “Maar dít sal ek ter harte neem, en om dié rede bly ek hoop: deur die liefde van die Here het ons nie vergaan nie; daar is geen einde aan sy ontferming nie; dit is elke môre nuut. U trou is groot.”

GEDAGTE
Nuutheid fassineer ons. Ons hou van nuwe klere, nuwe selfone, nuwe programme, nuwe ervarings… Nuutheid trek ons aan, en ons kan skaars ophou praat daaroor.

Een van die mees interessante vorme van nuutheid is ’n “upgrade” of opgradering — wanneer ons ’n nuwe selfoon of rekenaar kry. Ons ken almal daardie opgewondenheid: jou toestel word heeltemal oorgedoen. Wat verouderd was, word vervang. Alles werk vinniger, lyk beter en funksioneer net mooier. Dit voel soos ’n splinternuwe begin.

Het jy al daaraan gedink dat ons elke dag ’n “upgrade” van God se genade ontvang? Elke dag is Sy genade nuut. As jy terugdink aan hierdie jaar, hoe baie kere het jy nie Sy groot genade beleef nie? Die waarheid is: elkeen van ons ontvang daagliks ons porsie genade uit God se hand. Dit is elke môre vars, nuut en genoeg.

Hierdie waarheid bring hoop. Maak nie saak wat hierdie jaar gebeur het nie — God kan herstel, genees en weer laat begin. Elke dag bied ’n nuwe geleentheid om die deur van die verlede toe te maak en ’n splinternuwe begin te omhels. Dat God die dag in vier-en-twintig-uur segmente verdeel het, is reeds ’n stille uitnodiging om dikwels nuut te begin. Daar is altyd ’n nuwe dag, ’n nuwe maand en ’n nuwe jaar. Maar die nuwe begin word eers ’n werklikheid wanneer ons besluit om dit aan te gryp.

Sukkel jy met skuldgevoelens of veroordeling? Voel jy sleg oor iets wat jy hierdie jaar gedoen het? Wat verby is, is verby — en God kan jou vergewe en jou weer nuut maak. Jeremia herinner ons in Klaagliedere dat God se genade elke oggend nuut is. Hy gee vir jou ’n nuwe begin — ook vir die nuwe jaar wat voorlê. Gee oor… en laat God met jou nuut begin. Dalk is dit tyd vir ’n opgradering?

GEBED
God wat alles nuut maak,
vernuwe my hart vandag.
Was weg al my sondeskuld
en asem U lewe in my hele wese.
Vorm my deur U genade,
dra my deur U liefde,
en help my om te wandel in die nuutheid wat U gee.
Amen.