Dagstuk | Woensdag 9 April 2025

Vandag is Woensdag 9 April en ons is die week op reis na Palmsondag – die triomfantlike intog.

Ons reflekteer vandag oor ‘n esel en nederigheid.

Jesus se keuse om op ’n esel Jerusalem binne te gaan, was ’n kragtige simbool van nederigheid. In ’n tyd van oorlogswaens en vertoon, het Hy vrede en eenvoud verkies. Dit daag ons uit om ons eie trots te konfronteer en sy voorbeeld na te volg.

Saggaria 9:9 “Jubel, Sion! Juig, Jerusalem! Jou koning sal na jou toe kom. Hy is regverdig en hy is ‘n oorwinnaar, hy is nederig en hy ry op ‘n donkie, op ‘n hingvul van ‘n donkie.

Hierdie profesie, vervul op Palmsondag, wys Jesus as die Vredevors. Die esel dra ’n Koning, maar bly onopvallend. So ook word ons geroep om Jesus te dra sonder om onsself te verhef. Palmsondag is ’n uitnodiging tot ’n lewe van diens, nie aansien nie. Mag ons vandag Jesus se nederigheid omhels en ons lewens in sy diens stel, soos die esel wat Hom gedra het.

Wyheid van ‘n woestynvader: “Vlug weg van die eer van mense, want dit is ’n strik vir die siel.” Jesus se intog op ’n esel was nie vir vertoon nie, maar vir waarheid. Ons word herinner dat ware krag in stilte en ootmoed lê.

Gebed: Here, laat my U dien in eenvoud en my hart reinig van die begeerte na lof. Maak my minder sodat U meer kan wees in my. Amen.”