Dagstuk | Saterdag 15 November 2025

Teks

Psalm 27:14

Vertrou op die Here! Wees sterk en hou goeie moed! Ja, vertrou op die Here!

Oordenking

Die boek Openbaring eindig met die woorde “Maranata” — dit beteken: “Kom tog gou!”
Openbaring verwoord die angs en onsekerheid waarmee die vroeë gelowiges gekonfronteer is toe die wêreld waarin hulle leef anders verloop het as wat hulle gehoop en geglo het.

Hulle het met die verwagting geleef dat Jesus nog in hulle eie leeftyd sou terugkeer om die onreg aan te spreek en die gebrokenheid van die wêreld heel te maak. Tog het die mag van die Romeinse Ryk net sterker geword, en hulle lewens as gelowiges het al moeiliker geraak. “Here, vat ons asseblief net uit hierdie omstandighede weg,” moes hulle dikwels bid.

Tog was die bedoeling van Openbaring nie om gelowiges uit hulle swaarkry te neem nie, maar om vir hulle ’n nuwe perspektief op die lewe te gee — een wat hulle bemagtig het om, ten spyte van onreg en hartseer, steeds betekenisvol te leef.

Dít is presies waartoe Psalm 27:14 ons vandag oproep. Die psalm bekla nie wat verkeerd loop nie, maar roep ons op tot hoop in ’n God wat ons bemagtig, selfs te midde van moeilikheid.

Dink vandag anders oor die uitdagings wat voor jou lê. Jou probleme hoef nie die laaste woord te hê nie.
God bemagtig jou om dit te hanteer.
Wat sou dit vandag vir jou beteken?

“Vertrou op die Here! Wees sterk en hou goeie moed!”

Gebed

Here, leer my om op U te wag.
Wanneer my hart ongeduldig raak, herinner my dat U tyd altyd volmaak is.
Gee my moed wanneer ek swak voel,
en versterk my geloof wanneer ek begin twyfel.

Laat ek met vaste hoop op U vertrou,
wetende dat U nooit laat is nie, maar altyd getrou.
Help my om stil te wees voor U, Here,
en om te wag totdat U self my stap wys.

U is my lig en my redding —
ek sal nie vrees nie.
Amen.