Dagstuk | Woensdag 3 Desember 2025

Ons Adventsreis het Sondag begin toe ons twee besondere kerssangdienste gevier het wat ons dieper in die verhaal van Kersfees ingetrek het. Elke Sondag op pad na Kersdag steek ons ’n nuwe Adventkers aan — en hierdie week dink ons saam oor die kers van hoop.

Tema: Die hoop wat nie beskaam nie
Skrif: Romeine 5:3–5 – “Ons verheug ons ook in swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop, en die hoop beskaam nie, want God het sy liefde in ons harte uitgestort deur die Heilige Gees wat Hy aan ons gegee het.”

Vir baie mense klink hoop soos ’n mooi maar naïewe woord. Maar Paulus sê: die soort hoop waarvan God praat, word in die vuur gevorm. Dit is nie goedkoop optimisme nie, nie ’n glimlag wat die pyn probeer wegsteek nie. Dit is hoop wat deur nagte van twyfel, mislukkings en trane gevorm is — en presies daarom beskaam dit nie.

Die eerste Kersfees was alles behalwe romanties. Maria was swanger sonder om getroud te wees. Josef het eers aan egskeiding gedink. Die jong gesin moes vlug na Egipte toe, weg van gevaar. Maar te midde van hierdie onstuimigheid het God se Gees die hoop van redding in hulle harte kom plant.

En dieselfde Gees woon vandag in ons. Wanneer jy deur swaarkry of verdrukking gaan, is dit nie omdat God jou straf nie. Dit is omdat Hy in jou ’n dieper en sterker hoop besig is om te bou — ’n hoop wat storms oorleef, ’n hoop wat dra.

Gebed
Heilige Gees, stort vandag U hoop in my hart uit.
Leer my om nie van my pyn weg te skram nie, maar daarin U krag te ontdek.
Bou in my ’n hoop wat nie beskaam nie, sodat ander in my lewe iets van U liefde en teenwoordigheid kan sien. Amen.