Dagstuk | Vrydag 30 Oktober 2026

Tema: My denke oor ander mense

Bybelteks: Hebreërs 13:1

As broers moet julle mekaar altyd liefhê.

Boodskap

Dit is nie maklik om die foute van ander mense af te skryf nie. Ons dra soms jare lank ’n stuk bitterheid teenoor iemand met ons saam. Ons dink gereeld daaraan en herkou partykeer oor en oor presies wat gebeur het. Ons sê dalk vir ander: “Ek het vir so-en-so vergewe, maar laat ek jou vertel wat hy/sy aan my gedoen het …” Maar met sulke opmerkings mislei ’n mens jouself! Elke keer wanneer jy ’n slegte storie oorvertel, vlam die opgekropte woede teenoor daardie mens weer in jou op. Jou gedagtes bring dan al daardie negatiewe emosies weer na vore.

Ons mag nie in bitterheid leef nie, want die Here sê dat ons mekaar moet liefhê. Ons behoort ook nie sleg te praat van ander nie. Ons is nuwe mense. Deur die werk van die Gees word ons al hoe meer na die beeld van Christus verander. Daarom behoort bitterheid en skinder nie deel van ons lewe te wees nie. Wanneer ons aan sulke gevoelens toegee, oortree ons die basiese beginsels van ons hemelse Vader se koninkryk. Hierdie negatiewe denke oor ander maak ons net bitter. Praat jy met deernis oor diegene wat jou in die verlede seergemaak het? Dit is baie moeilik, maar tog is dit die beste pad na ’n nuwe manier van dink oor hulle.

Vra God om jou van alle bitterheid te bevry. Ontvang sy vergifnis. Staan dan van jou knieë af op en gee ruimte vir sagte woorde en dade van vergifnis om ’n nuwe vastrapplek in jou denke en lewe te kry.

Gebed

Here,

Vernuwe asseblief my denke oor ander mense. Help my om nie net raak te sien wat hulle verkeerd doen nie, maar om hulle te sien soos U hulle sien – met liefde, genade en deernis.

Bewaar my daarvan om vinnig te oordeel of aannames te maak. Gee my ’n sagte hart wat bereid is om te luister, te verstaan en te vergewe.

Here, verander my gedagtes sodat my woorde en optrede ook verander. Laat my deur U oë na ander kyk en help my om in elke mens iets van U beeld raak te sien.

“Skep vir my ’n rein hart, o God, vernuwe my gees en maak my standvastig.”

— Psalm 51:12