Dagstuk | Saterdag 17 Januarie 2026

TEKS

Psalm 27:14
“Vertrou op die Here! Wees sterk en hou goeie moed! Ja, vertrou op die Here!”

TEMA

Vertrou jou lewe toe aan die Here

BOODSKAP

Elke nuwe jaar bring iets nuut: ’n nuwe begin, nuwe keuses, nuwe uitdagings, nuwe doelwitte en ’n vars kans om lewe te leef soos God dit bedoel. Hierdie gedagte het my laat stilstaan:

Wyse mense is mense wat die Here vertrou met die besonderhede van hulle lewe. So leer Spreuke 3:6. Moenie dink jy is sterk of slim genoeg om jou lewe op jou eie te beplan nie, want jy is dit nie. Sonder God se leiding kan jy maklik verdwaal en die spoor byster raak.

Doen iets beter as om self die kastaiings uit die vuur te probeer krap: vertrou op die Here, selfs in die kleinste dinge van jou lewe. Soek sy raad wanneer jy ’n besluit moet neem. Vra na sy wil wanneer jy wonder of jy ’n bepaalde rigting moet inslaan. Klop aan by die hemelse deure as jy ’n nuwe projek in die Naam van die Here wil aanpak. Kyk altyd op na God en laat Hom jou lei met sy wysheid.

Wanneer jy jou vertroue in God plaas, kan jy sy rus betree — ’n plek van vrede waar jy deur die lewe kan reis met die wete dat God saam met jou gaan. Hy gee om vir jou en belowe om in jou behoeftes te voorsien, sodat jy kan ophou tob en bekommer.

Stap hierdie jaar in met die woorde:

“God, ek vertrou U volkome. Ek hoef nie bekommerd te wees of bang te wees nie. Ek sal nie meer toegee aan vrees of angs nie. U is die bron van my vertroue.”

Hoe meer jy hierdie waarheid in jou hart laat insink, hoe makliker sal jy vertroue bo bekommernis en geloof bo vrees kies.

GEBED

Here,
lei my op U weë, soos U wil, tot U eer.
Amen.