Dagstuk | Vrydag 25 April 2025

Johannes 21:15

Na Jesus se opstanding en eerste verskyning aan sy dissipels moes Petrus se gewete hom aangekla het. Voor Jesus gevange geneem is het hy almal duidelik laat verstaan hoe toegewyd hy aan Jesus leef, maar tydens sy verhoor het hy Jesus verloën en met die kruisiging van die prentjie verdwyn. Met Jesus se tweede verskyning aan sy dissipels na sy opstanding in Johannes 21 ontknoop Jesus die spanning as hy die volgende vraag drie keer aan Petrus stel: Simon, seun van Johannes, het jy my werklik lief? In hierdie oomblik draai Jesus Petrus se skuld om in ‘n nuwe roeping. Volgens die vroeë kerkvaders (die dissipels se eie dissipels) is Petrus as gevolg van sy geloof in Rome gekruisig en het versoek om onderste bo gekruisig te word omdat hy nie waardig is om soos Jesus te sterf nie. Petrus se ontmoeting met Jesus in Johannes 21 was as te ware ‘n bekerings oomblik.

Paasfees bring ons wat die Here al ‘n leeftyd ken by ‘n plek om die Here se herstellende liefde te ervaar en te ondervind hoe dit ‘n nuwe sin van bestaan in ons kom oopbreek.

Gebed

Here ons Vader, met nederige harte kom ons vandag voor U, bewus van u grootheid en u liefdevolle omgee vir ons. Ons wil ons lewens weer aan U wy en ons toewyding aan U bevestig. Here, help ons om met volharding en opregtheid aan U verbonde te bly. In ’n wêreld vol afleidings vra ons dat U ons gedagtes en ons harte gefokus sal hou op U wil en U waarheid. Gee ons die krag om verleiding te weerstaan en die moed om getrou te bly, selfs wanneer dit moeilik raak. Here, laat ons liefde vir U elke dag groei, sodat ons in alles wat ons doen U wil sal soek. Mag ons lewe ‘n refleksie wees van u lig en waarheid, en mag ons dade altyd die eer en lof aan U bring. Versterk ons geloof en gee ons die wysheid om u stem duidelik te hoor te midde van die geraas van die wêreld. Here, transformeer ons gedagtes en verander ons harte sodat ons getrou aan U kan bly sonder voorbehoud. Dankie dat U ons liefhet en ons lei. Ons plek ons vertroue en ons lewe in u hande.

Amen.