Lydenstyd 2026

Aswoensdag het die begin van die Lydenstyd aangekondig. Hierdie Sondag is die eerste van ses Sondae wat opbou tot die Groot Lydensweek – die week waarin ons saam op ’n besondere manier Jesus Christus se lyding en sy liefde vir ons gedenk.

Indien jy ’n rooi kruis het, plaas dit gerus gedurende hierdie tyd aan jou voordeur as sigbare herinnering aan Christus se liefde vir ons. Jy kan ook ’n kers op ’n sigbare plek in jou huis neersit en dit weekliks aansteek as teken van gebed en nadenke.

Nog ’n betekenisvolle gebruik in Lydenstyd is om doelbewus van iets te vas – byvoorbeeld sosiale media, koffie of sjokolade. Só skep jy ruimte vir bewuste stilword, gebed en dankbaarheid, en herinner jy jouself aan Jesus se offer en sy liefde vir  elkeen van ons.