Noot-vir-noodfonds: Helpende hande in tye van nood.

Deur:  ds. René Potgieter

In elke gemeenskap kom daar tye wanneer die lewe onverwags moeilik raak. Siekte, werkverlies, gesinskrisisse of skielike noodsituasies kan mense oorweldig laat voel en onseker maak oor die toekoms. As ’n kerkgemeenskap glo ons dat niemand hierdie tye alleen hoef deur te gaan nie. Daarom bestaan die Noot-vir-noodfonds.

Die Noot-vir-noodFonds is ’n spesiale fonds wat geskep is om lidmate van ons gemeente en mense in die gemeenskap te help wat hulself in dringende finansiële nood bevind. Die naam herinner ons aan die doel daarvan: om hulp te bied wanneer daar nood is.

Die fonds stel ons as gemeente in staat om praktiese hulp te verleen soos die aankoop van kruideniersware, by te dra vir basiese huishoudelike behoeftes, skoolfonds, mediese koste, of ander dringende behoeftes. Al is die hulp soms klein in materiële waarde, dra dit ’n baie groter boodskap — dat ons as gemeente omgee en dat God se liefde sigbaar word deur die goedhartigheid van sy mense.

Die fonds word moontlik gemaak deur die vrygewigheid van ons gemeente. Elke bydrae, maak nie saak hoe groot of klein nie, word deel van ’n gesamentlike poging om iemand in ’n moeilike tyd by te staan. Dit is ’n pragtige voorbeeld van die Bybelse oproep om mekaar se laste te dra en om om te sien na dié wat swaarkry.

Ons nooi almal in ons kerkgemeenskap uit om die Noot-vir-noodfonds te ondersteun. Op Sondag 15 Maart bied die deurkollekte lidmate geleentheid om tot die fonds by te dra en op dié praktiese wyse Jesus se opdrag om mekaar te versorg, uit te leef.