Dagstuk | Maandag 24 Augustus 2026

Die gesig van Barmhartigheid
Hoe lyk omgee vir ander?

Dit is my voorreg om die volgende week se dagstukkies vir jou aan te bied. Augustus is die maand van barmhartigheid, en daarom het ek die tema vir die volgende dae gekies om hierby aan te sluit.

Maandag 24 Augustus 2026

Tema: Sien die mens raak

Skriflesing: Lukas 10:30–37

Teks: Lukas 10:33
“Maar ’n Samaritaan wat op reis was, het op hom afgekom, en toe hy hom sien, het hy hom innig jammer gekry.”

BOODSKAP

Ons leef in ’n wêreld waar mense maklik onsigbaar word. Ons sien die skare, maar ons sien nie altyd die mens nie. Ons sien iemand wat swaarkry, maar loop soms verby omdat ons haastig is of omdat die probleem vir ons te groot voel.

Die Samaritaan het egter gestop. Hy het die man langs die pad raakgesien. Hy het nie net sy wonde gesien nie; hy het ’n mens gesien wat hulp nodig het.

Barmhartigheid begin dikwels met iets baie eenvoudig: om iemand raak te sien.

Miskien is daar iemand by jou werk, in jou familie, in die gemeente of selfs langs jou in die kerkbank wat swaarkry. Hulle glimlag dalk, maar binne-in is hulle stukkend.

Jesus vra vir ons: “Wie is die mens wat Ek vandag oor jou pad stuur?”

Kyk hierdie week doelbewus rondom jou. Wie het jy dalk gesien, maar nog nie werklik raakgesien nie?

Barmhartigheid begin wanneer ons ophou om net mense te sien en begin om mense raak te sien.

GEBED

Here Jesus,

maak my oë oop om die mens in nood raak te sien.
Help my om nie verby iemand te loop wat U liefde, bemoediging of hulp nodig het nie.

Gee my ’n hart wat omgee,
ore wat luister,
hande wat help
en voete wat bereid is om nader te gaan.

Here, help my om in elke mens iets van U raak te sien.
Laat my lewe vandag ’n gesig van U barmhartigheid wees.

Amen.