Dagstuk | Woensdag 19 Maart 2025

Bekering

Teks. Joël 2:12-13 – “Maar nou sê die Here: Kom met julle hele hart terug na my toe, vas, huil en treur! Skeur julle hart, nie julle klere nie.”

Wanneer ons aan bekering dink, dink ons aan gedrag wat moet verander. Bekering is God wat ons letterlik ‘omkeer’ om in ‘n ander rigting te loop. Alhoewel dit vir mense baie duidelik is wat mense moet doen om te verander/bekeer is die proses daarvan veel dieper en persoonlik. Dink vir ’n oomblik na oor jou eie sonde en skuld waarvan jy bewus raak en hoe jy dit hanteer. Jy kan as uitdrukking van hierdie ontdekking, of besef jou klere skeur. Tog, is ons eie wil dikwels nie sterk genoeg om ons eie gedrag te verander nie. Paulus verwoord hierdie frustrasie in Romeine 8 wanneer hy homself ’n ellendige mens noem. Ten spyte van sy eie pogings om homself te red kry hy dit nie reg nie. Die gevolg is dat hy aan God se oordeel oorgelaat is. Maar dan kom hy tot die ontdekking dat God se genade veel groter is as sy eie onvermoë.

Ons teksgedeelte verwoord Paulus se stryd. Die opregtheid om sy eie tekortkominge en onvermoë te kan bely – ‘n hart wat verskeur is en hoe die Here hom daaruit lei tot ’n plek van vergifnis. Voor hy enige iets kon doen om sy skuld en sonde reg te maak het die Here se genade en liefde hom van binne verander. Wat vra die Here van ons?  ’n Opregte hart – ’n hart wat verskeur is oor die realiteite van ons en ander mense se sonde. Ons gedrag wat verander is baie meer as ons eie planne om dinge reg te maak – dit is die spontane reaksie van die vergifnis wat ons ontvang.

Gebed.

Liewe Hemelse Vader, Ek kom na U met ‘n oop hart, honger na U teenwoordigheid. Ek weet dat ek sonder U verlore is, dat my hart soms dwaal en deur sondige begeertes mislei word. Maar ek wil verander, Here. Ek wil hê dat my hart heeltemal aan U behoort. Vorm my, Here, soos ‘n pottebakker klei vorm. Breek die harde plekke in my hart af en vervang dit met ‘n hart wat U eer. Maak my rein, was my skoon, en lei my op U regte pad. Ek bekeer my van my sondes en vra vir U vergifnis. Trek my nader aan U en vul my met U Heilige Gees. Laat my denke, woorde en dade ‘n getuigskrif wees van U liefde en genade. Dankie, Here, dat U my nooit los nie, dat U genade nuut is elke oggend. Ek vertrou op U en gee my hart volkome aan U oor. Amen.